«МТАЖО» АҚ Медицина қызметкерлерінің құзыреттерін дамыту орталығы ҚР ПІБ Медициналық орталығы ауруханасының қызметкерлеріне «Мультидисциплинарлық команда мамандарының практикасындағы денсаулықты сақтайтын және инновациялық медициналық-әлеуметтік технологиялар» тақырыбында семинар өткізді.
Семинар барысында қатысушылар халық денсаулығын сақтаудың заманауи тәсілдерімен, медициналық-әлеуметтік технологияларды тәжірибеге енгізудің тиімді жолдарымен танысты. Сонымен қатар медициналық-санитариялық алғашқы көмек (МСАК) көрсететін мамандардың өзара тиімді іс-қимылы, мультидисциплинарлық команда мүшелерінің бірлескен жұмысы және пациентке бағытталған медициналық көмекті ұйымдастыру мәселелері қарастырылды.
«Аурудың алдын алу – денсаулықты сақтаудың негізгі бағыттарының бірі. Ерте анықтау, жүйелі бақылау және уақтылы шара қабылдау асқыну қаупін азайтып, пациенттің өмір сапасын арттыруға мүмкіндік береді», – деп атап өтті МСАК, дәлелді медицина және созылмалы ауруларды басқару саласының сарапшысы, семинар лекторы Гульнара Камалбекова.
